مختارات من شعر الشاعرة إيمان يوسف

الفصل الثالث من كتاب

مختارات من شعر إيمان يوسف

بين الرؤية والأداة

ــــــــــــــــــــــــــــــــــــــــــــــــــــــــــــــــــــــــ

تقديم ودراسة :الأستاذ الدكتور مختار عطية

ــــــــــــــــــــــــــــــــــــــــــــــــــــــــــــــــــــــــــ

المختارات الشعرية

نورد فيما يلي عشرين قصيدة قد تخيرناها من دواوين الشاعرة تمثل في مجملها ذلك الالتحام بين الأداة والرؤية من خلال زوايا ومحاور كل منهما.. وقد اعتمدنا في تخير هذه القصائد على إصدارات الشاعرة مرتبة ترتيبًا زمنيًا من الأقدم إلى الأحدث..

ولم تكن هذه المختارات عشوائية وإنما أردنا أن تمثل الرحلة الإبداعية للشاعرة في تنوعها وتعدد أغراضها وموضوعاتها وصياغاتها..

1- إلى أستاذي العزيز

من ديوان "عرايس الشعر"

يا سيدي

لما جيت وقلت لك

إنقذني من ليل الغرق

الشوق هازمني والقلق

حتى سراير غربتي.. بتنسرق

سقطت عروق نبض الوطن

كل الكلام الدنيوي

ياللي ملامحك هيه هيه نورانية

كل الحضارات مذهبك

قلبك الفضفاض

دا بيلم التعب

يبقى لنا بستان للدوا

يا سيدي

سلمت لك الأسلحة

لجل ما ألقى دليل حريتي

نزعت ستر الزيف

من دنيتي

وياه كمان جمر الجوى

كبرتني.. علمتني الطيران

بقيت

عصفورة بتناجي القمر

تسكن في حضن العلم

تتعلم تطير في أسواق البشر

من غير خطر

علمتني

إزاي حقيقتي المطلقة

إيه الصواب

فين الخطأ

علمتني

لحظة جنوني ألقى الحكم

علمتني من مركبي

أطرد أنا مستعمري

علمتني

إن الشجاعة مولدي

وإزاي أوجه خطوتي

يبقى الرضا طول المدى

علمتني

إن القصايد دنيتي

بسم المهم تكون قضايا

ف كل ما يهم البشر

يا سيدي.. يا معلمي

ليك بانحني

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/08/15/235021.html

2- نـدم

من ديوان "مشاعر"

وباتمرد يا رب الكون

وأرجع تاني أسجد لك

بأشوف نورك في كل مكان

ما بين ألوان ما بين أشكال

أشوف الناس وأشوف الفجر

لما يهز ستر الليل

وأشوف الورد فوق غصنه

مع النسمة بدلال بيميل

أقول يا رب..

وأرجع تاني أتمرد

وأنسى لجل أكون إنسان

كتافه هموم أحمال

ودم هابيل

مازال سايل بيروينا

يا آدم أنت ليه عاصي

وليه بتطاوع الشيطان

وتتمرد وتتندم

ونرجع تاني للقرآن

نصلي الفرض والسنة

ونبقى في حمى الرحمن

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/08/17/235149.html

3- ترنيمة عطا

من ديوان "تنهيدة صبية"

وباعشق عيونك

بلونها السماوي

في سحر القمر

أدندن وياما

يقول الوتر

يوحد ما بيننا

قصيدة أمل

ويمزج دمانا

شجوننا وهوانا

في معنى نبيل

وهمس القلوب

بنبضه الحنون

في لحظة سكون

في لحظة شقاوة

تقول العيون

وصوت الكلام

وصمت المكان

دا يبقى نشيد

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/08/19/235339.html

4- الصومـال

من ديوان "تنهيدة صبية"

هز الهوا الستاير

نبشت في ذكرياتي

رجعت تاني طفلة

مكتوب على جبينها

في ذلة وانكسار

حروف حزن الزمن

***

جوه الصومال لقيتني

في خيمة الانهيار

غرقانة في العرق

وناس بتسف رملة

وناس تاكل في طين

***

وشفت البؤس دايمًا

في وشوش الشقيانين

خطوط دايمًا بتصرخ

من أفعال السنين

***

آهات بتفور وتعلا

في دوامة الحياة

ومعفرة العيون

من سكة السفر

وطول الانتظار

***

يا أصحاب السيادة

يا أصحاب المعالي

الغول فارد ضوافره

ومقفل الطريق

والموت بكاسه داير

يا صومال المسلمين

***

نشكي ونقول لمين

مين اللي يمد إيده

من جيش المسلمين

"عطشان يا صبايا"

عطشان يا مصريين

عطشان والنيل متعكر

في بلدنا ومليان طين

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/08/19/235408.html

5- تنهيدة

من ديوان "تنهيدة صبية"

أرجوك يا ضي الكون

إرقيني بالبسملة

إملاني حني

لفلفني بعبايتك

وداريني م الحية

دا الفرح غاب ياما

والتوهة دوامة

والقسوة بتموت

م الحرقة جوه الجوف

وخريف طواه الشوف

حريف في ليل الخوف

أرجوك يا ضي الكون

جز السنان جزه

هز البدن هزه

دمع اللي فات طاغي

قلبك ما بيلاغي

افهمني لو مرة

ليه كلمتك مرة

حرفك سهام اللوم

والضحكـة

صوت موهوم

حزنان ومتخاصم

أرجـوك

يا ي الكون

حصني من عينهم

حتى وأنا بينهم

خليني في حمايتك

إرقيني بالبسملة

إملاني حنية

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/08/19/235423.html

6- لحظة سفر

من ديوان "تنهيدة صبية"

قلمي

ورقي

عيوني

شفايفي

كوني

كلامي.. سكاتي

بيسألوا ليه

الشمعات بتدوب

والمعات تتحجر

والأحلام تتبحتر

وضفاير حزني المحلولة

في قمر ليلي بتقول:

ليه الأحلام مرهونة

في زقاق جواني

في حواري العتمة.. لكن

في صفحة رؤيا الواقع

من سطر الغربة

في صفحة (ص)

في مذكرتي بتلاقي

مع قلب كبير

بيلم حنان الدنيا

نبتدي رحلتنا

بعد ما نفرد

شراعات مركبنا

أنا والفجر

والقلب الأخضر

ونسافـر

بضمير عطشان

للحب

علشان نتقابل

مع بكرة الجاي

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/08/31/236360.html

7- أكون أو لا أكون

من ديوان "وشوشة البحر"

وتحجبني عن العالم

أنا راضيـة

وحجمني على قدك

أنا موافقـة

تعلمني أعيش عهدك

أكون زيك

ومين زيك

أكون قدك

ومين قدك

أنا موافقة

بأن اللحظة توجدني

وتاخدني

وتولدني

هنا ف قلبك

وأبدأ خطوة من جنبك

أكون أو أكون

منك

تكونني وتقسمني

وتطرحني وتجمعني

وعقلي

مش حايمنعني

لأني

بحكمة اخترتك

تعلمني

أكون أو لا أكون.. منك

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/08/31/236393.html

8- نغمشــة

من ديوان "وشوشة البحر"

قشعريرة فيها خوف

رغوشات بيها نلوف

ويا زعابيب النفوس

إنكسر

كل التناغم بالفلوس

انفلت منا الوضوح

كل شيء

حسب الظروف

واللي مألوف يستحيل

نقراه ما بين خط الكفوف

إنما

يتوجد في ذبذبات رنة شجن

سر ترانيم الحياة لما أنكتم

خنق الأمم

والتناقض طلّع الدخان علينا

الزمن بيفر ليه من بين أيدينا

والجنون في القلب شاعر

أد إيه معنى الفزع

أد إيه العمر

موضوع م الزمن

والحقيقة

كلنا في حاجة ماسة

لكف عافى يضمنا

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/02/236482.html

9- هارمـوني

من ديوان "وشوشة البحر"

سن القلم لو ينغمس

في زحام حياة كل البشر

حاتجرنا

لحروب خطيرة معلنة

أو غير كده

صدق البيان

والقنبلـة

بتطل من عين الحياة

ويا المباهج والمتع

هارموني

ف زمن الحدث

تأتلف أصوات كتير

في لحظة من عين الزمن

تلمح تمللي في البشر

رنة شجن تايهة

بتسقط م الكلام

تدور المواجع

في ساقية الفكر المتيم

مجنون في روح متكدسة

جوه المشاكل

لكنها في الأصل

حقنة مؤقتة

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/01/236450.html

10- شمسي

من ديوان "وشوشة البحر"

لازم أصرخ

آه وأتمرد

أبعد وأخرج

روح وأتجرد

من سياساتي

قبل ما أفقد زهر حياتي

مش حاخضعلك

وأكون صورة من أسرارك

وتبرمجني

على أفكارك

اتعودت أكون موجودة

ليا كياني ومش محدودة

ولا مسجونة جوه جدارك

مهما حايحبطني مشوارك

حا اتناقش بثبات

وأقـرر

برضه حاأدافع عن موروثي

وحاأحافظ على كل طقوسي

مهما يكون الفرح اتغرب

برضه أنا حا أرجع

ثاني وأقرب

مش حاخسر أبدًا وأسلم

وأتناقض وأبكي واستسلم

أصل ما أحبش أكون مهزومة

شايلة ورايا أمور مهمومة

اتعـودت

أكون إنسانة

ما أقبلش على نفسي إهانة

ليا طريقي

وليا كياني

طموحاتي وذاتي وآمالي

تتحدى الدنيا البهتانة

راح أدافع عن كل حقيقي

وأثبت لك

إن أنا موجودة

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/01/236438.html

11- مصري.. إهداء للدكتور/ أحمد زويل

من ديوان "لحن الحنين"

مصري في كل مكان

ولهفته طوفان

يا غنوة متأصلة

تحكي تاريخ أزمان

يا حكمة الأجداد

يا قيمة للإنسان

وطن وله عنوان

بيعافر الغربان

***

بقوة شموخ الشمس

وضي انصهار القمر

وحضارة

تحكي الأمس

***

يا نبع خير النيل

سر الحياة بيميل

في حضن أراضينا

وقلوب في أعماقها

سر انجذاب لينا

يا توب بلون أخضر

فارد سنابل فرح

يا إدين بتتقابل

تتعافى تبني الصرح

وتعلي في الحاضر

***

يا ضوء نهار بلدي

في شروق أمل حاضر

يا مصري يا صابر

شد زمام العمل

والاحتمال قادر

يرفعنا فوق الكون

يا مصري يا قادر

يا فكر يا نادر

مصري في كل مكان

يا قيمة للإنسان

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/02/236538.html

12- صورة مهزوزة

من ديوان "لحن الحنين"

وكأن شيء فيا

بيشدني ليا

محصورة بين ذاتي

وكأني مش هية

***

مشدودة بين نفسي

ممسوحة الذكرى

وكأني بين نكره

موجودة محسوبة

خارج إطار كونها

مسنودة بظنونها

والحزن في جفونها

***

يا فروع تنادي الشجر

وعروق تنادي الدم

مشدودة بين لا شيء

لا حاسة ولا بأهتم

***

يا مولدي اللي فات

إولدني من تاني

أنا تهت في مكاني

حسيني يا لحظتي

متشردين فكري

وكأني من صغري

وخداني وبتجري

***

يا لحظتي همي

وخديني من حالي

قولي لي أنا هية

ولا أنا مالي

***

إمتى حيرجع لي

كياني من تاني

وأحس أنا بإني

الواقفة في مكاني.

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/04/236630.html

13- أغنية السـلام

من ديوان "مصر جنة بتبتسم"

غنى غنى للسلام

لجل أيامنا اللي جاية

السما حاضنة النجوم

إحضنينا يا أرضنا

إحضنينا يا أمنا

بددي كل الغيوم

فجرى الخير اللي فينا

وابدريه ع الإنسانية

رجعينا طيبين

افرشينا بالتفاؤل

جددي فينا الرضا

والمحبة ع المدى

***

غني غني للسلام

اطوى في حروف السؤال

وضحي شمس الإجابة

لسه في عقولنا استجابة

علمينا

فاض خلاص الجرح بينا

لملمينا في الشروق

وابعدي الأحزان لفوق

فوقينا من آهاتنا

دي الحروب سرقت ولادنا

والدمار حوط علينا

إحضنينا

نيمينا فوق جناحك

قلبنا

عاشق براحك

حولينا طيبين مسالمين

***

غني غني للسلام

ضحكينا من قلوبنا

طهرينا من ذنوبنا

قيدي لينا نور طريقنا

وامسكي إدينا اللي فارقت

جميعنا وعدي بينا

والضمينا بالآمان

إغسلينا بالإيمان

غني غني للسلام

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/04/236694.html

14- حضن الطبيعة

من ديوان "مصر جنة بتبتسم"

عيوني بتسأم

قرار الغضب

في كل الوشوش

وبين الخلايق

بتسدل ستار

ع الحروب والخداع

ونبض التزاحم

وأحقاد تلازم

قلوب البشر

عيوني تنادي

بتوقيت رجوع

لضل الطبيعة

وكل الربوع

بساتين وروضة

في قلب النجوع

تغني البلابل

لشدو المزارع

وتمسح دموع البلاد الحبيبة

تعيد التفاؤل

لصمت الوجود

وتطلق توهج في روح الزمان

وتهدي النفوس وتنسى العبوس

ومن فوق كابوس

بتوقيت رجوع.. لحضن الطبيعة

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/05/236722.html

15- يا بحر عشقاك

من ديوان "مصر جنة بتبتسم"

باجيلك دايما

وكأني لأول مرة بشوفك

أرمي خوفي وقلقي

في جوفك

تبدر أمواجك على خدي

تتهدهد نفسي

تاخد يأسي ف صدرك

ترمي ف صدري هدوئك

أتعلم منك

شوقك.. ندهتك.. صرخاتك

وغرورك

خيرك عمقك زهوك

وهدوئك وقانونك

بارتاح بين حضنك

وف لحظة خوفي

وف لمس كفوفي

أنا عاشقة جنونك

وبأجيلك دايما

وكأني

لأول مرة بأشوفك

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/05/236762.html

16- أغنية عشـق

من ديوان "يا فرح صاحبني"

أبدأ منين

حنيتك مالهاش مثيل

ورقتك مالهاش بديل

قلبك وعقلك.. ضحكتك

مليان صفات

ومميزات

أبدأ منين

***

كل ما فيك

محتاج ليالي

تعبير وشرح

روحك صفائها

يشفي جرح

يا حياة وفرح

***

لو الحروف اتشبكت

واتقسمت

واتبسمت

تبقى أغاني

بستان وعطر

حبك دا سحر.. بيطوي سر

شوقك دا لحن من الحنين

نغمة بتشجيني سنين

أبدأ منين

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/08/236939.html

17- العمر وراقـة

من ديوان "يا فرح صاحبني"

لموا الجراح م البيت

وارموها تحت المطر

الشمس بكره أكيد

حيقول لها القمر

تدخل على قلوبنا

ترمي غبار التعب

دا العمر وراقة

***

ليه سقفنا مخروم

ليه شكلنا مهموم

شباكنا مش فاتح

لنسمتي طاقة

دا العمر وراقة

نقطعها نرميها

وتعدي لياليها

ونفوق

بعد ما نلقى

ورقها صبح فاضي

لا بيحكي عن بكرة

ولا زمان ماضي

بدن الحياة أبيض

ورق الحياة مكتوب

سطر وعليه اسمك

***

مطوى ف جواب سرك

نورك ما بين حسنك

فعلك بقى محكوم

افرد جناح قلبك

رفرف على غيرك

لم الجراح م البيت

وهات لنا خيرك

دا العمر وراقة

أمتى حنتلاقى

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/06/236790.html

18- يا شاعـر

من ديوان "أنيس قلبي"

باحس إنك عود قصب

بيتعصر جوه المكن

وعصيره من دم المحن

الشاعر حطب

بيشتعل بين الساعات

وينطحن

ساعات بيتحول حروف

وقت التعب

بيشتعل وقت الغضب

يفرد رماد الكون عليه

يغزل معاني بتنتصب

بين القصايد تتنصب

يبني في سماه

وسط الشموس

جفف بورقة دمعته

قلمه بيغزل فرحته

بين القصايد دنيته

مملكته هيه دولته

وبهجته ونشوته

وسطوره نور

بتقيد شمـوع

وسط الحطب

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/06/236805.html

19- أحضان السنين

من ديوان "أحضان السنين"

يا أحضان السنين

يا بسمة بين صدورنا

تتلاقى بالحنين

بنعاود الأحبة

ونصافح الطفولة

ذكرى ويا زماننا

لكلمة ولحظة أولى

ونلملم ضحكة هلة

في خيال دايم في ذاتنا

تنهيدة بين آهاتنا

وتتغير ظروفنا

ويتنور وجودنا

ويتفرق ورقنا

نبكـي

نقول اتسرقنا

بين أحضان السنين

نتقابل بين نصيبنا

ما يفضل غير أسامي

ومشاعر بالأماني

وإحنا ويا الطريق

ما بين عدو وصديق

نسترجع في اللي فاتنا نسرح في خيال دفين

وشواطئ موجها داير

جوانا بالدواير

والبحر دار علينا

ما خلا حد فينا

إلا وبيدوق ف ملحه

والدنيا ساعات تسامحه

وأهي دايره منا فينا

في أحضان السنين

ومهما فات شبابنا

بنحسه ف روح حبيبه

بتقرب من مشاعرك

يمكن بتكون طبيبه

تتلاقى بالحنين

في أحضان السنين

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/11/237211.html

20- فتافيت الحلم

من ديوان "أحضان السنين"

إمتى الزمن يبتسم

ويداري أنيابه

وإمتى حيرجع

لعشه أغرابه

مال الوداد ع الرف

خلي السكك تتلف

قلقانة م الترحال

توهة وفايتة علينا

سايبة الوجع فينا

وكل يوم بيفوت

يرمينا كيف جينا

مهما الزمان علانا

ليه الفرح طرفه

أو لحظة في لقانا

فين يا زمان طيرك

الصبر طال ياما

ملينا تأخيرك

إمتى بقى تبتسم

ويعود لنا خيرك

..........................

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/11/237154.html

للوصول إلى المقدمة والباب الأول والثانى من الكتاب اضغط هنا >>

رابط : http://emanalan.blogspot.com/